Aristanis - Sunt cumintzados sos traballos pro s'installatzione de un'ascensore nou in su Tribunale. Est su primu de una sèrie de interventos chi s'Amministratzione comunale at aviadu pro sa sistematzione de su Palatzu de Giustìtzia. Pro s'ascensore sa Comuna at postu 224 mìgia èuros. Cussos chi bi sunt giai non lompent a sos parchègios internos e a s'àrea de atzessu pro sos disàbiles. S'impiantu nou, de 12 postos, imbetzes arribat a totu sos pranos. L'at a cumpletare in 4 meses sa dita Cadoni.

In s'ìnteri sa Comuna at apaltadu a s'impresa Paba de Tramatza sos traballos pro sa manutentzione istraordinària de sa cobertura. Cun 118 mìgia èuros cheret torrada a fàghere s'impearmibilizatzione e cherent eliminadas sas infiltratziones de abba. In fines sa Giunta at aprovadu su progetu esecutivu de 300 mìgia èuros pro sa sistematzione de su parchègiu de su Tribunale, cun 74 postos, 3 pro sos disàbiles e 33 pro sas motos. In prus ant a fàghere s'impiantu de irrigatzione e de illuminatzone. Sas dies coladas s'est riunida sa Cummissione pro sa manutentzione e sa seguràntzia de su Palatzu de Giustìtzia chi at aprovadu totu sos interventos.

Pone a cumone custu artìculu