Casteddu - Ugo Capellacci at decraradu ca sa Regione est giai in cuntatu cun sa Cummissione de s'Unione Europea pro sa situatzione de s'Alcoa. B'at una riunione tècnica su 10 de freàrgiu chi su presidente sardu b'at a partetzipare.

Segundu Cappellacci sas multinatzionales leant detzisiones foras de su territòriu e non tenent prus, cun sa globalizatzione, una bisione ètica. S'obietivu est a delocalizare in logos prus cumbeniosos. Pro custu est cumbintu chi tocat a promòvere su turismu pro afortire s'economia sarda.

In sa riunione de Brussellas de su 10 funtzionàrios italianos e comunitàrios devent discùtere su decretu energia chi pertocat sa chistione Alcoa. Sos italianos ant a dèvere dimustrare pro ite custu provedimentu non rapresentat un'agiudu istatale e non vìolat sas normativas comunitàrias.

Pone a cumone custu artìculu