Sa manifestatzione de oe in Casteddu, chi b'at àpidu una presèntzia multitudinària, at postu in evidèntzia sas contradditziones de su mundu sindacale in cunfrontu de sa situatzione sarda. Pro cumintzare, dae sas allegas in su palcu de pratza Yenne est essidu a pìgiu chi b'at 2 prospetivas diferentes. A unu chirru b'est sa positzione de su segretàriu generale de sa Cisl sarda Mario Medde, chi at pedidu un'istatutu ispetziale nou pro s'Ìsula e sa cunvocatzione de un'assemblea costituente. Est craru chi segundu Medde sa crisi ocupatzionale de sa Sardigna no est contingente ma sistèmica.

Pro la risòrvere duncas tocat a dare a sos sardos sas ainas netzessàrias a l'afrontare dae intro, cun solutziones a medida, giai chi non si podent aplicare sas matessi retzetas usadas in aterue. A s'àtera ala però cheret registradu s'interventu de Carmine Barbagallo, segretàriu cunfederale de sa Uil, chi at naradu ca sa Sardigna est Itàlia. E si sa Sardigna est Itàlia sa solutzione devet arribare dae foras, est a nàrrere dae su guvernu istatale de turnu. E tando sa Sardigna est che a sa Sitzìlia e a sa Calàbria o est diferente dae totu sas àteras partes de sa Repùblica italiana?

A custa chistione si collegat s'interventu de Gianni Baratta, segretàriu cunfederale de sa Cisl. Segundu su sindacalista italianu su lìmite de sa Sardigna est ca s'indùstria òcupat su 19% ebbia de sa produtzione, sa metade de sa mèdia italiana. Prus indùstria prus isvilupu, custa s'idea sua. Su fatu est chi est pròpiu s'indùstria su setore prus in crisi. E custu non dae como ma si podet nàrrere dae pagos annos a pustis de sa chi deviat èssere sa 'rinàschida' isulana, chi at sacrificadu massaria e pastoriu in nùmene de fàbricas chi ant produidu prus chi no àteru cancru e cassa integratzione.

A custa optzione esterna si cuntraponet, in manera ideale, sa proposta de sos precàrios de s'iscola. In unu volantinu distribuidu dae su comitadu de Casteddu, sos insegnantes si lamentant de s'impatu chi sa riforma iscolàstica istatale at a tènnere in Sardigna, in ue dae ocannu chi benit ant a serrare unas 300 iscolas in sas biddas piticas. Pro custu pedint sa promulgatzione de una lege regionale chi cunsìderet sas peculiaridades e sas esigèntzias ispetzìficas de sas iscolas de Sardigna. 

Pone a cumone custu artìculu