Casteddu - Lunis 8 de freàrgiu s'assessore a sa Massaria Andrea Prato at a imbiare a s'Ente Parcu una rechesta ufitziale pro permìtere sa pisca in sa fasca de sos 150 metros, rispetende semper s'ambiente e atuende unu sistema a rotatzione pro àreas e perìodos determinados. In prus, comente est essidu a pìgiu dae pagu, sa zona est rica de aritzones e in custu casu puru Prato at a pedire una dèroga pro sa pisca a sos echinodermas. S'Ente at manifestadu un'abertura a su diàlogu.

Sas novas las ant annuntziadas custu mangianu in una riunione in Istentinas, organizada dae s'amministratzione comunale pro faeddare de sas problemàticas de sa pisca in su Nord Sardigna. Bi fiant s'assessore, una rapresentàntzia de piscadores e unos cantos cussigeris regionales de majoria. Sos operadores ant pedidu prus agiudu, mescamente pro sas infrastruturas, a sos entes pùblicos. Prato pensat finas a sos istagnos a curtzu de sa bidda comente risorsas produtivas e ocupatzionales. S'assessore at propostu un'initziativa de Giunta e Cussìgiu pro una lege cuadru pro sa pisca.

Pone a cumone custu artìculu